Die Tarentaal

 

 

Die tarentaal

Die kruiwawiel se skreeugeluid

kerm hy droefgeestig uit

terwyl die skeemring vinnig daal,

die tarentaal.

 

Hy soek - en dit is ook al laat -

vir hom 'n kameraad,

om in 'n boom die eensaamheid

en nag te slyt.

 

Sáám sal hul in 'n blinkblaarboom

half slaap, half waak, half droom,

en by die naadring van verderf,

alléén nie sterf.

 

Ek het gemik, en met die knal

het een dood neergeval;

die ander vlieg met wilde krag

wèg in die nag!

 

Totius (J.D. du Toit)

 

 

Comments