Muskiete Jag

Muskietejag

Jou vabond, wag, ek sal jou kry,
Van jou sal net 'n bloedkol bly
   Hier op my kamermure.
Deur jou vervloekte gonsery,
Deur jou gebyt en plagery
   Kon ek nie slaap vir ure.

Mag ek my voorstel, eer ons skei,
Eer jy die doodslag van my kry -
   My naam is van der Merwe.
Muskiet, wees maar nie treurig nie,
Wees ook nie so kieskeurig nie,
   Jy moet tog ééndag sterwe.

Verwekker van malaria,
Sing maar jou laaste aria -
   Nog een minuut vir grasie.
Al soebat jy nou nòg so lang,
Al sê jy ook: ek is nie bang,
   Nooit sien jy weer jou nasie...

Hoe sedig sit hy, O, die kreng!
Sy kinders kan maar kranse b reng,
   Nóu gaan die vabond sterwe...
Pardoef! Dis mis! Daar gaan hy weer!
Maar dòòd sal hy, sowaar, ek sweer -
   My naam is van der Merwe!


    
A.D. Keet
   uit: Die Afrikaanse poësie in 'n duisend en enkele gedigte
     (Bert Bakker 1999)



www.eposvriende.com  
www.emailbuddys.com
www.twitter.com/eposvriende
 
http://groups.yahoo.com/group/eposvriende/